Rusia shpall “Reporterët pa Kufij” organizatë të padëshirueshme

Autoritetet ruse kanë futur organizatën ndërkombëtare “Reporterët pa Kufij” në listën e “organizatave të padëshirueshme”, duke ndaluar në praktikë çdo veprimtari të saj në territorin rus.

Sipas ligjit të miratuar më 2015, i cili është përdorur gjerësisht pas nisjes së pushtimit të Ukrainës në vitin 2022, organizatat e huaja që konsiderohen kërcënim për sigurinë kombëtare mund të ndalohen, ndërsa stafi i tyre rrezikon ndjekje penale.

Kremlini ka intensifikuar shtypjen ndaj mediave të pavarura, duke miratuar ligje që ndalojnë kritikat ndaj ushtrisë. “Reporterët pa Kufij”, me seli në Francë, njihet për denoncimin e shkeljeve të lirisë së shprehjes dhe mbështetjen ndaj gazetarëve të përndjekur.

Vetëm muajin e kaluar, një gjykatë ruse dënoi me 12 vite burg një gazetare dhe ish-vullnetare të liderit të ndjerë opozitar Aleksei Navalny. Organizata e përshkroi rastin si simbol të shtypjes së zërave të pavarur dhe kërkoi lirimin e saj.

Aktualisht, lista e “organizatave të padëshirueshme” në Rusi përfshin rreth 250 entitete, mes tyre Radion Evropa e Lirë, Amnesty International, Greenpeace dhe Universitetin Yale.